Fréttir

Framkvæmdastjóri Samiðnar í viðtali

Framkvæmdastjóri Samiðnar Elmar Hallgríms Hallgrímsson var í viðtali hjá Samfélaginu á Rás 1. Þar var m.a. farið yfir verkefnastöðu iðnaðarmanna um þessar mundir, mikilvægi átaksins „Allir vinna“ og hvatningu til stjórnvalda að fara í auknar framkvæmdir.

Hlusta má á viðtalið hér - Samfélagið Rás 1

Samskiptin rafræn

Vegna hertra sóttvarnaraðgerða er móttaka skrifstofu Samiðnar lokuð um óákveðinn tíma og einungis tekið við erindum í gegnum síma og tölvupóst.

Sími - 5400100
Tölvupóstur - This email address is being protected from spambots. You need JavaScript enabled to view it.

Betur má ef duga skal

Í síðustu viku vakti Hagfræðideild Landsbankans athygli á því að fjárfestingartölur hins opinbera eru í ekki samræmi við yfirlýsingar stjórnvalda. Þar kemur m.a. fram að fjárfesting ríkissjóðs hafi minnkað um 17,1% milli fyrri árshelminga 2019 og 2020 og fjárfesting sveitarfélaganna um 9%.

Eru þetta mikil vonbrigði enda hafa stjórnvöld marglýst því yfir að gefa eigi verulega í hvað varðar fjárfestingar hjá hinu opinbera á þessum erfiðu tímum sem nú ganga yfir land og þjóð.

Er það mat Samiðnar að auka þurfi verulega fjárfestingar hjá hinu opinbera og að mikilvægt er að stjórnvöld standi við þau fyrirheit sín. Oft hefur verið þörf en nú er nauðsyn að stjórnvöld snúi vörn í sókn og grípi til frekari aðgerða hvað opinberar framkvæmdir varðar.

Átakið "Allir vinna" hefur sannað sig

Hilmar Harðarson formaður Samiðnar ritar grein í Fréttablaðið í dag þar sem hann rekur mikilvægi átaksins "Allir vinna" fyrir bæði fólk og fyrirtæki og mikilvægi þess að það nái einnig yfir skráningarskild ökutæki.  Átakið sé ekki síst neytendum til hagsbóta því fólk leitar nú frekar til faglærðra varðandi endurbætur og viðhald í stað "svarta hagkerfisins".  Tæplega 3.500 umsóknir hafa verið afgreiddar og endurgreiðslur nemið tæplega 2,3 milljörðum frá áramótum og fram til 18. ágúst.

>> Sjá nánar.

Lögfræðingur óskast til starfa

Lögfræðingur óskast til starfa hjá 2F Húsi Fagfélaganna.

Helstu verkefni eru að veita ráðgjöf varðandi túlkun ráðningarsamninga, kjarasamninga og laga. Aðkoma að vinnu starfshópa á vegum iðnaðarmannasamfélagsins, þátttaka í kjaraviðræðum, umsagnir og málarekstur þegar svo ber undir.
Gerð er krafa um að umsækjendur hafi lokið meistaraprófi í lögfræði og æskilegt er að hafa málflutningsréttindi. Þekking og reynsla af vinnumarkaðsmálum er kostur.
Um er að ræða nýtt og spennandi starf í krefjandi starfsumhverfi.  Lögfræðingur mun heyra undir skrifstofustjóra 2F sem er þjónustuskrifstofa iðnaðarmannasamfélagsins að Stórhöfða 31.

Nánari upplýsingar um starfið veitir Pálmi Finnbogason (This email address is being protected from spambots. You need JavaScript enabled to view it.).  Umsóknir sendist á netfangið This email address is being protected from spambots. You need JavaScript enabled to view it..

Umsóknarfrestur er til 22. september.

Góð verkefnastaða en óvissa framundan

Verkefnastaða iðnaðarmanna hefur verið góð í sumar en eins og hjá öðrum er óvissan inn í veturinn nokkur. Verkefnið “Allir vinna” hefur haft þar mikil áhrif þar sem það felur í sér fulla endurgreiðslu á virðisaukaskatti vegna vinnu við margvíslegar framkvæmdir, svo sem byggingarframkvæmdir og bílaviðgerðir.  Samiðn mun óska eftir að því verkefni verði framhaldið en það á að öllu óbreyttu að líða undir lok í árslok 2020. Samiðn leggur áherslu á að umrætt verkefni er einnig mikilvægt út frá neytendasjónarmiðum enda tryggir það enn frekar að leitað sé til fagmanna sem er mikið kappsmál allra.